قرآن پڑھے تے بھل بیٹھے
اسی وچ کتاباں تل بیٹھے
من اپنے آپ نوں کل بیٹھے
ہر شان سمجھ بے مل بیٹھے
ہر راہ وچ رج کے رل بیٹھے
بس مرشد آن بچایا اے
ساہنوں مرشد حق پڑھایا اے
نہ عاشق رب دوارے دے
نہ روضے نبی ﷺ پیارے دے
نہ مست علیؑ دے نعرے دے
اسی رلدے وچ خسارے دے
پر صدقے پیر سہارے دے
پھڑ سدھے رستے پایا اے
ساہنوں مرشد حق پڑھایا اے
نہ لبھیا ککھ کتاباں چوں
اس متھے دے محراباں چوں
سب نیک و بد حساباں چوں
اسی کڈھی جان عزاباں چوں
پھڑ بوتل حق شراباں چوں
جد مرشد گھٹ پیایا اے
ساہنوں مرشد حق پڑھایا اے
پڑھی لکھ نماز مصلے جی
کدی اک نہ پیندی پلے جی
کویٗ زور نہ دل تے چلے جی
جد نفس نے بوہے ملے جی
جو مرشد دے ہتھ تھلے جی
اس سجدے رب ملایا اے
ساہنوں مرشد حق پڑھایا اے
دل پاک بنا کی سجدہ اے
بس نک تے متھا بھجدا اے
کج داڑھی نال نہ کجدا اے
جیہڑا والی سب دی لج دا اے
اوس رب نوں چانن چج دا اے
کس اوس تھیں ککھ لکایا اے
ساہنوں مرشد حق پڑھایا اے
پےٗ آون ابد سنیہڑے جی
لکھ حشر دیہاڑا نیڑے جی
سوہی مول نہ ڈردے، کیہڑے جی؟
رب جنہاں دے دل دے ویہڑے جی
ناں رب دا درد نبیڑے جی
سوہی ساہواں نال پکایا اے
ساہنوں مرشد حق پڑھایا اے
Tagged 1. Islam, haq, murshid, sufi
2 Responses to ساہنوں مرشد حق پڑھایا اے