رب نے پہلاں آپ منائ سوہنی عید محمدﷺ دی
نوری جھنڈیاں نال سجائ سوہنی عید محمدﷺ دی
جشن منائے عرشاں اتے، نور وسائے فرشاں تے
ملکاں، حوراں شان ودھائ سوہنی عید محمدﷺ دی
پیر تے جمعرات دا روزہ رکھ کے پیارے آقاﷺ نے
ہر مومن نوں کھول وکھائ سوہنی عید محمدﷺ دی
آقاﷺ دا میلاد منایا دم دم نال صحابہ نے
اہلِ بیتؑ نے رِیت بنائ سوہنی عید محمدﷺ دی
مسجد نبوی ویہڑے دے وچ ہویا کٹھ صحابہ دا
جدوں عباس نے نعت سنائ سوہنی عید محمدﷺ دی
شعر ولادت والے لکھدے پڑھدے جدوں صحابہ سی
کسے نہ پچھیا کتھوں آئ سوہنی عید محمدﷺ دی
اج ولادت دا دن سوہنا، لکھ لکھ شکر منائیے جی
رب نے ساہنوں فیر ملائ سوہنی عید محمدﷺ دی
گلی گلی وچ لگیاں جھنڈیاں آقاﷺ دے میلاد دیاں
گھر گھر دے وچ رونق لائ سوہنی عید محمدﷺ دی
کھڑ پئے رنگ محبت والے، مہکیاں سب گلزاراں نیں
عالم دے وچ ہے روشنائ سوہنی عید محمدﷺ دی
نعتاں پڑھدے وچ مسیتاں، نعرے لاون بازاراں چے
سنی کردے عشق کمائ سوہنی عید محمدﷺ دی
احمد نام محمدﷺ والے ہوون راضی بخشش نوں
منگ دعاواں کراں لکھائ سوہنی عید محمدﷺ دی